Champions Trophy: Australia final-i ai; India-i takok angu

London, June 15 (Agencies): Australia teloki goal 2-0 agi Belgium madak takok ngua tang tasayadak 36 buba Hero Champions Trophy hockey asayamong final asayatsü jenjang yashi, Mongolbar nü nguogo.
World No.1, Australia teloki tan takok anguba densema, asaya 4 nung ajak agi points 10 ajangzüka points timba ajangzüker telok akümba ajanga final asayatsü jenjang angur lir.
Australia telok sülen anidaka, India-i points 7, Britain-i points 5 aser Belgium-i points 4 ajangzüka temaba jenjang nung alir telok tarensen nung tang 2 buba, 3 buba aser 4 buba jenjang nung lir.
Ajisüaka, Great Britain telok den goal 1-1 draw tanü anguba densema, defending champions, Germany teloki asaya 4 nung draw 3 aser tamakok ken anguba densema, tan asayamong nung ken danga takok mongutetba yong par teloki tan asayamong nung joko toktepa shilem magitettsüsa jenjang tamajung ajurua liasü.
Tanü takok anguba sülen Britain teloki asaya 4 nung ajak agi points 5 ajangzükogo aser tatembangba round-robin asaya Belgium den asayatsü lemzükogo.
Yashi asaya nung Glenn Turner-i minute 38 buba aser Tristan White-i minute 49 buba nung goal kaka agüja par Australia telok nem takok ngudaktsü.
India telokia goal 2-1 agi South Korea telok madak takok ngua asayaba osang jangjaogo.
Captain SV Sunil-i minute 39 buba nung goal 1 agüja India temaba jenjang nung ajungkettsü saka S Korea asayar, Kim Jun-hu-i minute 57 buba nung goal 1 agüja par telok anaprongla kasa jenjang kümdaktsü.
Kim-i goal agütsür second 30 shi tsüngda nung Nikkin Thimmaiah-i külem asayar, Talwinder Singh-i yanglutsüba cross ball agizüka tanabuba aser takokba goal agüja India nem takok ngudaktsü.
Taoba mapang otsüsütsüsa Champions Trophy takok marok 13 ben tashi agizükba Australia teloki par tatembangba round-robin league asaya India den asayatsü.

You must be logged in to post a comment Login