Chandigarh-Dibrugarh Express nung nisung 2 asü

Guwahati, March 22 (Agencies): West Bengal kübok Siliguri anasa Chandigarh-Dibrugarh Express nung mi lendong ka atalokdang nisung ana asü.
Hokolbarnep 11.18 ako meta Chaterhaat Railway Station nung lendongji atalok aser engine nung adokba miji iba anasa aliba train taktangtem nunga kaolok, ta ketdangser kati ashi.
“Iba lendong atalokdang train nung mena alir passenger ana kimaleni jokzüka aludang asü. Iba dak alaka tanga nisungtem yiruba mesüra asüba osang kecha mali” ta paisa ashi.
Tanü anüngdang 12.35 ako meta miji enseptet.
Engine nung totzü senzüka aluba ajanga miji adok ama bilemer. New Jalpaiguri Junction nungi mi ensepba garitem bener arua miji ensep.
“Iba tesem ya meta talangka pilar oa lir aser mobile connectivity majung. Onoki teyari yokogo” ta NJP ADRM Partha Pratim Roy-ia ashi.