Chandigarh Municipal election nung BJP takok nguogo

Chandigarh, December 20 (Agencies) : Mongulbarnü Chandigarh nung menden 26 atema Chandigarh Municipal Corporation election agiba nung Bharatiya Janata Party (BJP) menden 20 nguteta takok tulu nguogo aser iba takok anguba ajanga ano maneni parnokisa yimsü asütsü maongka ngutetogo.
Chandigarh Municipal Corporation atema election ya Deobarnü agia liasü aser ibanü agiba vote temji Mongulbarnü azüng.
2011 küm congress-i menden 11 nguteta liasü saka tanbo menden pezü ang nguteta lir. Congress nungi tesüiba mapang adokertem Subhash Chawla, Harphool Kalyan, Poonam Sharma aser Kamlesh nunger ka tanga tan election nungbo madok.
Aji oda süaka BJP-i Shiromani Akali Dal den lokteper toktepba tesemtem nungbo menden pezü nungi ka nungang takok nguteta lir.
BJP anemer Dalip Sharma-i Independent party nungi takok ngua lir.
BJP nungi tang yimsü tesüdak Arun Sood-i pa den kanga anasatepa tokteper congress nungi Rajesh Sharma madak vote 2,077 agi angu.
Iba corporation nung züngsem 35 nüngdaker aser item rongnung Councillors 9 lir aser parnok vote agütsütsü temetenji Chandigarh Administrator V.P. Singh Badnore-i agütsür aser iba inyakyim nungji BJP MP Kirron Kher-a ex-officio züngsem lir.
Ato Kilonser Narendra Modi-i, “Chandigarh nung aliba nüburtemi BJP & Akali Dal na yariba asoshi kanga pelar. Iba takok ya ajanga nüburtemi yimsü junga sütetba sorkar den tesendaktep aliba sayur,” ta tweet asü.