Chandigarh nung apuani na dak asangur kati yi jemer azük

Chandigarh, December 12 (Agencies): Chandigarh, sector no 18 nung asangur kati yi jemer apuani na dak azük, ta police-i Hokolbarnü metetdaktsü.
Iba asangursang tenüngji Rajeev ta jangjaogo aser pa ya arishi küm 21 tain lir. Pai azükba kinungtsü o kinungbo na ya mobile ayokba dokan ka lapoka lir. Kinungbo tenüng Joginderpal Soni, arishi küm 58 aser kinungtsü tenüng Santhosh Kumari, arishi küm 56 lir.
Bodhbar aonung tenaprong dokan nung lia Rajeev par dokani aru aser tenadak azüktsü tenzük, ta police-i ashi.
Police-i ashiba agi, iba asangur ya yi jemer dokani arua tantsüla den yimya masüba benshitsü merang, ajisüaka lai nokdangba ajanga pai la dak tepu mazüka maoktsü aser la kinungboi yamai nung ta nokdangdang pa daka Rajeev-i azük.
Rajeev ya gari anir nisung ka lir aser apuani nati osang agütsüba sülen police-i pua lir. Apuani na jagi, ozü kidanger Rajeev den onok kecha len nungia tsüngchitepa mali, ta ashi.
Iba lendong sülen tena mozü kidang oa anepalu aser iba tatalokba dak sentakba nung Rajeev anema ken o benokogo, ta police-i ashi.
Iba tatalokba ajak par mobile dokan nung aliba CCTV nung menüngoka lir.