Chandigarh nung Sports Complex ana tepuokdak kümdaktsüogo

Chandigarh, Metsüremi/March 24 (Agencies): Chandigarh nung sports complexes ana khen atema tepuokdak kümdaktsüogo. Coronavirus prokshia meyoktsü asoshi curfew benoka aliba sülen manidakertem putena ayutsü asoshi iba tesem ana shimogo.
Principal secretary (home) Arun Kumar Gupta-i sangdong ka ajanga ashiba agi, Sector 16 nung cricket stadium aser Manimajra sports complex ya tenokdangba agütsür aliba mapang tashi amshia atatsü asoshi tepuokdak kümdaktsütsü.
Chandigarh nung coronavirus tashi keter alir nisung tenet jangjaogo aser ita nung NRIs 90,000 shi aruba ajanga tebilemtsü kaa bilemer.
Punjab governor-cum-administrator, Chandigarh, VP Singh Badnore-i Hombarnü kümdangshia alitsü atema yimti nung carfew benoktsü telemtetba agi. Chandigarh Adviser Manoj Parida-i ashiba agi, police aser medical nung inyakertem nem curfew passes agütsütsü.
Parida-isa, administration-i oxygen, LPG aser petroleum product densema tenüngdakba oset-tsüt bener arutsü atema Punjab aser Haryana den angatettepogo, ta ashi.
Maneni nüngdakra 125 isolated wards ama amshitsü asoshi Sector 22 nung Sood Dharamshala amshitsü telemtetba agiogo.
PGIMER nung block ka tashidak agi kongshir alirtem anepalutsü asoshi mejeta shimteta yuogo.