Chandmari, St. Paul & Northfield quarter tongogo

Kohima, Chiteni/July 2 (TYO): Chandmari Higher Secondary School, St.Paul HSS aser Northfield school-i tang tasayadak 2buba Kohima District Inter School Football Tournament nung tanü pei tata asaya koka quarter final tongtetogo. Iba asayamung ya Royal Club Kohima aser Youth Resources and Sports Department puri ayongzüka Kohima Local ground nung asayadagi.
Tanü round of 16 mezüngbuba asaya nung Chandmari Higher Secondary School puri tie-breaker ajanga Baptist Mission School Jotsoma madak 4-3 agi kokogo. Asaya tembangba tashi nung telok anapronglai goal kaka dang agütsütet.
Asaya mezüngbuba shilem nung goal ka danga magütsüteti tembangba sülen minute 49buba nung penalty ka ajanga Venüo-i Chandmari pur atema mezüngbuba goal idaktsü. Iba penalty ya Baptist Mission defender Mhasinyüzo-i box telung nung Khekivi alangdaktsüba atema agütsü. Ajisüaka mapang tatsüka dang lir minute 52buba nung Kedosie Nagi-i goal ka tekolak agi idakja goal kasasa aküm. Asayamung temzüng nung round of 16 mapang asaya draw süra extra time masayai indang indanga penalty metsütsü züngzüka lir, ajungji iba dak ajemdaker telok ana tsüngda tie-breaker asayaa liasü koba Chandmari puri 4-3 agi akok.
Asaya tanabuba nung St. Paul Higher Secondary School puri Holy Family Higher Secondary School 2-1 agi kokogo. Iba asaya ya-a draw nung tembanga liasü. Asaya nung mezüngbuba goal ya Holy family nungi asayar Honwen-i minute 16buba nung idaktsü, saka minute 40buba nung Keleze-i goal ka idakja goal kasasa aküm. Asaya draw nung tembangba sülen penalty asaya nung St Paul nungi goal keeper Thejasie aser Holy Family nungi goal keeper Rozü nati shot pezüzü nokdanga liasü saka St Paul puri sudden death nung akok.
Maneni tanü asaya tasembuba nung Northfield puri Government Higher Secondary School Jotsoma goal ana agi kokogo. Asaya mezüngbuba shilem draw nung tembangba sülen asaya tanabuba shilem tenzükli Northfield nungi asayar Kethosenyü-i mezüngbuba goal idaktsü aser iba sülen minute 67buba nung Samuel-i tanabuba goal idaktsü.
Chiteni/July 3 nü asaya yamai alitsü.
* Bethel Higher Secondary School vs Don Bosco Higher Secondary School, Kohima @ 11:00 AM
* Mt. Carmel vs G. Rio @12:40 PM
* Loyola Higher Secondary School Jakhama vs Grace HSS @2:40 PM