Chandni Chowk tensa atema Delhi HC-i police nem tetuyuba agütsür

New Delhi, April 6 (Agencies) : Chandni Chowk nung tensa majung alibaji tamajungba küma meyoktsü asoshi police-i nüngdakba mera agiang, ta Bodhbarnü Delhi High Court-i police nem ozüng agütsüogo. Temelaba meli-i tesemi aitba nokdangtsü atema tang Chandni Chowk nung mangatettep kar adoka lir.
Chandni Chowk tatalokba dak sentakba nung Justice S. Murlidhar aser Justice Vibhu Bakhru nati aniba obendanger telok kati Delhi Police dang Brihostibarnü tashi nung osang kanga junga asadanga bendentsü atema tetuyuba agütsüogo. Parnoki bendenba osangji Brihostibarnü angadangtsü.
March 28 nü court ajanga temelaba meli-i tesemi aitba aser süng o long agi tamangba dak sendakba noksa tulu yangluba ajak hopta ana tsüngda nung meshi meshia anentsü tetuyuba agütsüba sülen North Delhi Municipal Corporation ajanga iba inyakyim tenzüka liasü.
Bodhbarnü Chandni Chowk Vyapar Mandal-i high court nung iba tebilemtsü benokba sülen court-i iba tetuyuba ya agütsü.
NDMC-i item noksa tulutem raksaja aoba mapang nisung telok tulu kati long agi aontsü tenzüka mandal nung Tongti Tezülur Sanjay Bhargav yirutsütsü aser par dokan raksatsütsü merang, ta shishilembartem atema okatsür-i metetdaktsü.
Ibai lendong aketba tensa ka lir ta ashidang pai tang tera raksar aliba Bhargav’er dokan nung security agütsütsü atema police aser nüburtem dang nungi osang tejangja agitsüla, ta court nem temepishiba ka agüja lisü.
Iba tesem nung additional commissioner of police-i Bhargav aser par dokan nem security angütsütsü nangzükogo, ta Delhi Police-i court nem osang metetdaktsüogo.