Changkikong Senso Mungdang-i pelaba metetdaktsür

Dimapur, November 24 (TYO) : Changkikong Senso Mungdang ajanga Nagaland State Government, Finance Department aser Treasures & Accounts Department dang mapang talangka nungi Mokokchung Treasury Office nung attached süa aliba Mangkolemba Sub- Treasury Office, Mangkolembai belener alutsü takhangba agüja mepishia aruba langzüa, Sorkar aser bangdak Department-i November 20, 2015 nü iba office Mangkolembai belener luogo.

Mangkolemba Sub-Division kübok alir nüburtem timtem ajiteta CSM takangba ataloktsuba asoshi sorkar pangdakpur aser Department dang kanga pelar, ta CSM Tir, Imtipokyim aser Tongti Tezüluba, M. Achiba nati sangdong ka ajanga metetdaktsü.

“Iba den külemi Mangkolemba ADC Wb. Wabang Aier ajanga MBA Sub-Treasury office belener alutsü atema maparen ajak nung CSM den yaritepa tongti shilem agia takok ngudaktsüogo” ta sangdong nungsa shia lir.

“Wb. Wabang Aier Mangkolembai aruagi ADC menden nung amenba anogo nungi tenzüka tanü tashi nung Mangkolemba Sub-Division nung pa yimsüsüba kübok Government Department balala, SBI Mangkolemba Branch aser lokti maparen aika nung temelenshi adokdakja nüburtem den yaritepa amdagi. Item maparen ajak asoshi asen ADC aser pa den yariteper Administrative officers aser Department balala nung tekolak ketdangsür ajak nem Changkikong Senso Mungdang ajanga tenüngsang agütsür aser parnok dang pelaba lemsateper” ta CSM mendenpurtemisa ashi.

Maneni asen ADC aser administration den ajaki maparen ajak nung amalitepa yaritepa aotsü ayongzüker, ta tir CSM Tir, Imtipokyim aser Tongti Tezüluba, M. Achiba nati mepishia metetdaktsü.