Changlang district nung NSCN-K-i Assam Rifles amak

Guwahati, December 16 (Agencies) : Myanmar den arrtsüa aliba Arunachal Pradesh kübok Changlang district nung ozüngi noktanga aliba telok NSCN (Khaplang)-i Assam Rifles telok ka amak ta osang angazüker, ajisüaka Army-ibo iba osangji tiyazü ta ashir.
Iba tatalokba ya Changlang district kübok Langka nung atalok.
“Iba tesem nung sepaitem amakba osang kecha mali saka kasa tesem nung Assam Rifles-i telungpurtem anema mapa inyak. Langka nung telungpur kabo kahsetogo saka iba nisungji ano mejangjateti lir. Assam Rifles tsütsü nisung yiruba mesüra tasüba kecha maliasü” ta Defence PRO Lt Col S Newton-i sangdong ka nung metetdaktsü.
Parnoki ashiba agi, Hombar aonung nungi Mongulbar tashi parnok kahtep aser telungpurtemi RPGs dena amshi.
Mezüngbo telungpurtemji Khaplang’er telok asütsü akok ta temulung melemi bilem, kechiyong parnok iba tesem nung mapa inyaker.
Taküm June 4 nunga parnoki Manipur kübok Chandel district nung Army Dogra Regiment nungi sepai 18 tashi kahset.
November 6 nü Centre-i Unlawful Activities (Prevention) Act kübok NSCN(K) noktang. Parnoki tai maketba civilian aser sepaitem tepsetba aser June 4 nü Army amakba tatalokba nung ajemdaker Centre-i iba telemtetba agia liasü.