Changtongya: 2 buba Departmental football asayamong tenzükogo

Changtongya Sub-Division nung ayongba 2 buba Inter Departmental Football asayamong tenzükba sentong nung 1 buba asaya nung shilem agir, Joint Team aser APF United asayar aser asaya ketdangsertemi tongti tesemdanger, Mokokchung Sr. S.P., Aotemsu den aroki agiba noksa ka yangi angur. (Changtongya, May 23)

Chanyongtongya, May 23 (TYO): Mokokchung Senior Superintendent of Police, Aotemsu-i Chanyongtongya (Ctn) Town Local Ground nung 2 buba Changtongya Sub-Division Inter Departmental Football asayamong tanü, Hombar nü tenzüktsüogo.
Defending champion, Joint Team; Power Department Ctn; SDEO Ctn; GHS Ctn; PWD (R&B) Ctn aser Administration Police Forest (APF) United densema, telok 6-i tan asayamong nung shilem agitsü tenzüka lir.
“Tan amala asayamong ayongtsü tezüba masü saka Changtongya SDO (C) lenisüba kübok külem tenzükertemi anibelem mesasai inyakba atema pelaba lemsateper,” ta tongti tesemdanger, Aotemsu-i metetdaktsü.
“Asayadak koma shilem agir, iba jagi asayar ka indang jakla sayur,” ta shia, tejangraba tulu nung asayaba ama, pei tenzükba sorkar mapa nendaka inyaktsü tayongzükba olen ka pai sangoktsü.
“Changtongya Sub-Division kübok sorkar tenzüker ajunga sentaktepshija parnok rong nung amalitep lidaktsütsü nükjidong nung iba asayamong taküm agi kümnabuba ayongogo,” ta Changtongya SDO (C), Chumlamo Humtsoe-ia asayamong den sentakba osang jangjashitsü.
Tan asayamong takok ngua ayongba atema tayonger den pelaba olen ka lemsatepba den külemi, asayartemia tajungtiba agüja shilem agitsü tajungshiba olen ka tanü sentong nung tetushi tesemdanger, Rtd. Dy. Director, Limatoshi-ia lemsatepa liasü.
Iba asayamong ya anogo 13 tashi asayaba sülen final asaya taruba June ita 4 nü asayatsü aser takoker nem takok marok o senpet sen den kulikaket agütsütsü.
Ano, Best Player, Best Keeper aser Highest Scorer densema, individual shilem nunga tetemtsü asayartem nem senpet sen agütsütsü renema lir.