Changtongya: Brotherhood teloki Open Penalty Shootout akok

Dimapur, August 02 (TYO): Changtongya Kaketshir Telongjem (CKT)-i ayonger külen Changtongya Town Public Ground nung Open Penalty Shootout tetoktepba yashi, Hombar nü agiogo.
Ao Kaketshir Mongdang (AKM) 2017 yongya sentong den sentaktepa agiba tetoktepba nung telok 38 tashi shilem agia liasü.
Tan tetoktepba final nung Brotherhood, Mokokchung teloki Fusion Sporting Club, Mokokchung telok madak takok ngua, champion aküm.
1 buba jenjang angur telok, Brotherhood-i senpet sen 20,000 aser 2 buba jenjang angur, Fusion teloki senpet sen 10,000 agizük.
Ano, Fusion telok asayar, Yanger-i Best Goalkeeper senpet sen 2000 agizüka liasü.
Tan tetoktepba sentong nung Odimatsüng (Rtd Joint Director), Langpangkong Kaketshir Mungdang Kimen tongti tesemdanger liasü aser pa den külemi, AKM lenirtemia tan tetoktepba sentong nung shilem agiba osang angazükogo.