Changtongya community health center ayatai tia nung lir

– T. Meyi Longkumer,
All Ward Chairman, Changtongya Town.

Tang CHC Changtongya nung AYUSH doctor ka lir. Anungji nüburtem timtem reprangteta pai mapa ajak i.e. administration, patient aser official correspondence ajak repa kanga timtemseta mazüngi inyakdagi. Public representation aiben zülua tsüngdong higher authority den tebilemtsü aliba ajak angatetdakja aiben nenshier saka item tayimtemba ajak hua ta mali Community Health Center Changtongya AYATAI tia nung lir.
Tang India nung NDA sorkar arur Government nükjidong tongtibangji merükmejuba aser nübur tashidak tapu balala nungi kümzüka ayutsü sentong lia Prime Minister Modibai India lima ajaklen District shia Medical College kaka lapoktsü ta yimjak nung ayimoktsüogo, saka Nagaland nung PDA Government-i CHC 30 bedded hospital ka nung AYUSH doctor ka yutsübaji tim asü masü ta nübur süngmangteper.
Nagaland state mangudang 2nd October 1955 nung Changtongya National Service extension lapoktsü. Ano kodang Nagaland state angu government-i Primary Health Center hospital lapoktsü. Maneni nütsüng timba züina aonung agi iba PHC nungi Community Health Center upgrade sütsüa 1988 nung Changtongya CHC inaugurate asü kechiaser iba mozü ki nung areasanger dang masü Longleng district aser Tamlu sub-division nungi shiranger arur tanebtsü teyari agi.
CHC mozüki ka nung doctor SMO 1, MO 2, Dental 1 aser AYUSH 1 tabo alitsü tim saka dang iba hospital nung aliba doctortemji Dr. Imtijungshi SMO Mon-i June 2018 transfer ao aser Dr. Khriekoli MO Kohima Civil Hospital-i attached bener oadok aser CHC Changtongya against nung itasen agia Kohima nung inyaker. Dental doctor ka hapta nung khen (Tuesday) alur aji ateam kanga pelar. Ano tesasatsüka koba 3rd October 2018 nungi Measles Rubella campaign lir CHC Block under nung yimtsüng 7, Town ward 11, School 22 aser Anganwati 21, item ajak ajaayangtsü AYUSH doctor kati supervise asütsü asür aser iba den vaccinator mali anungji iba ama CHC teküpokba tia nung doktsüba ya nüburi kanga mepelar.
Anungji 2nd October 2018 matongdangsa PDA sorkari nübur tayimtemba ola mapa küma meinyaktsüra onok Changtongya area nung alirtemi anogo telatet mekai government dang nübur tim atemba tamaitsü sayua National Highway No.61 aser Longleng Road ajak nokdangtsü ola ayimoktsür.