Changtongya-i Nokdenlemba Volleyball takok marok benogo

Champion team Changtongya Volleyball Association A pur den chief patron MLA Azo Nienu aser AKM ketdangsürtem külemi 3buba W. Nokdenlemba Open Volleyball tournament senpet agütsüba sentong agir noksa tangokba yangi angur. Mokokchung, Oct 19, 2018.

Mokokchung, Mongputeni/Oct. 19 (TYO): Mongputeni/October 17 nungi tenzüka anogo asemnü tashi 3buba Padmashree W. Nokdenlemba Open Volleyball Tournament 2018 yangi Multi Sports Complex Mokokchung nung asaya mungogo aser taküm iba asayamung marok Changtongya Volleyball Association A-i benogo.
Tesüsabuba asaya Changtongya Volleyball Association aser yaküm defending champion Longsa Sporting Club Mokokchung na asayaba, C.V.A (A)-i 25/19, 19/25, 22/25, 25/10 aser 15/12 agi Longsa Sporting Club madak takok ngua liasü.
Mezüng set C.V.A-i akok, aser tanabuba aser tasembuba set-ji LSC-i koka liasü, aser pezübuba set-ji C.V.A-i koka tena 2-2 aküm, aser tesüsa deciding match asayadang, C.V.A-i koka parnoki taküm iba asayamung marok bener ogo.
Takoker nem asayamung marok den kuli kaket aser senpet sen lakh ka aser tatong (runner-up) nem kuli kaket den senpet sen 60,000/- agütsü. Semifinal nung tsüker Waromung Sports Association Jangjanglong Club aser Lakhuni Sporting Club nema sen meyi metsü-tsü (20,000/- each) agütsüogo.
Iba den ano jurila senpet best spiker – Bendangtemsü, Best Setter – Toshienba aser Most Promising Player – Imkongsanen, parnoki agizüka liasü aser par asemprong ya Changtongya Volleyball Association (A) team nungi dang lir.
Mezüng Ao Kaketshir Mungdang (AKM) tir W. Nokdenlemba nüngtem nung ayongba iba asayamung ya taküm “One Team One Spirit” omen dak rangloker ayongzük aser team 7-i shilem agia liasü. Iba asayamung ya kümsem nung khen AKM-i ayongzüka akar.
Asayamung shibangba aser senpet agütsüba sentong nung MLA Kuzholuzo (Azo) Nienu Chief Patron ka ama arua pai tayongzükba o tulu den asayamung nung senpet sen ajakji pai sponsor sütsü.