Changtongya jila nung Mokokchung DPDB senden amen

Mokokchung, Metsüremi/March 07 (TYO): Ita shia amenba Mokokchung District Planning and Development Board senden March 7, 2019 nü Dobashi Court SDO (C) Changtongya nung Advisor, Industry & Commerce, NIDC, Imnatiba leniba nung menogo; iba senden nung PWD Minister, Tongpang Ozukum-a aden, ta tanü Mokokchung District ketdangsertem osang ka ajanga metetdaktsü.
Mokokchung Deputy Commissioner & Vice Chairman, DPDB, Rajesh Soundararajan, IAS-i züngsem ajak pelaa agizük aser züngsemtemi pei sasa tejak shiyutep.
Chairman DPDB Mokokchung-i, Mokokchung district kübok jila balala nung DPDB senden amenba ya PDA sorkari nisung ajak den sendakteptsü nükjidong nung lir, ta metetdaktsü.
Paisa, taruba anogotem nungbo ano MLA timba adentsü, ta metetdaktsü.
Chairman DPDB-i, Nagaland Chief Minister-i lanurtem nem maongka agütsüba atema pelar, ta ashiba den külemi ketdangsertem dang, sorkar tenzükba mapang nung ketdangser ajaki tarutsü nükla yur inyaktsüla, ta ashi.
Senden nung züngsemtem den jembidang PWD Minister, Tongpang Ozukum-i, tang mezüng gari lenmang yanglushitsü aser anepalutsü atema department nem bendang agütsü, aser pai kanga mulung asür, ta metetdaktsü.
Paisa, ali kibur shirnoki department dang nungi percentage meshidir pai iba nungji mekongshitsüla, ta ashi.
Senden nung “Community & Social, Welfare Society” Yajang Village upgrade asütsü Board-i agizük aser Mokokchung Town gari lenmang yanglushitsü aser anepalutsü atema E.E PWD (R&B) Mokokchung-i benokba züngsemtemisa agizükogo.
Civil hospital Mokokchung aser DC office complex upgrade tesüdak lir, aser iba dak sendakba nung Board-i iba maparen tekaraba nung inyaktsü mepishir.
Kasa senden nung benokba onükatem rongnung Education & Social Welfare publication nung Child Help Line logo print asütsü aser Mokokchung district nung office ajak rong ateptsü atema jembi.
Tesüsa SDO (C) Changtongya-i tepela anküp o jembia senden tembanga liasü.