Changtongya jila nung M&R Vaccination Campaign School Rally agi

Changtongya, Mongputeni/October 03 (TYO): Measles aser Rubella Vaccination Campaign dak sendakba nung arishi ita 9 nungi küm 15 tanurtem nem vaccine agutsütsü atema Mongputeni/October 1 nü Changtongya Town Police Point nung school rally ka agiogo.
School rally ya Department of School Education Changtongya Town, Nagaland-i ayongzüka liasü aser iba nungji Changtongya town nung aliba nija aser sorkar school ajaki shilem agia liasü.
Iba sentong nung jembidang M.O Ayush, Community Health Centre Changtongya, Dr. Wapang-i, iba rally ya Measles aser Rubella tashidak indang metetdaktsütsü atema agir, ta ashi.
Paisa, item tashidak ya measles aser rubella vaccine agiba ajanga dang nokdangtettsü, ta ashi.
Paisa tsürabur ajak dang iba ya süoki ia agitsü aser tanurtem nem measles aser rubella vaccination agidaktsütsü atema ajungshi.
Kasa sentong nung SDEO Changtongya, Satemmongla-i, World Health Organisation aser India sorkari measles aser rubella vaccination agutsür, aser iba ya 2020 küm tashi nungbo linük nung iba tashidak samatsütsü atema lir, ta metetdaktsü.
Laisa iba rally takok ngua agitetba atema tanurtem aser tesayurtem dang pelaba lemsatep.