Changtongya nung COVID-19 atema senden amen

Quarantine center amenokba asadangtsü asoshi May 16, 2020 nü Changtongya Dobashi Court nung osang-ola agitepa senden ka mena liasü.

Dimapur, Monupii/May 17 (TYO): Nagaland alema orr anendaka aliba Naga nungertem jila-i tanaben meyipa shilangba sülen anemponga ayursü atema quarantine center yangluba asadangtsü asoshi Changtongya Dobashi Court nung SDO (C) Moa Kumzuk Tzudir menden sür senden ka May 16, 2020 nü mena liasü.
Pai iba senden nung ashiba agi, administration ajanga Government High School Changtongya B nung item nisungtem atema yipten 20, medical staff atema yipten 10, Government Middle School Longchara nung yipten 10 aser GA rest house Changtongya town nung yipten 10 renema lir. Tanüngba nisungtem ya pei yimtsüng nung quarantine center tem renema alidak yoktsü.
Changtongya-i arur ajak anogo 14 anemponga quarantine center nung ayutsü, ta pai ashi.
Quarantine center incharge Dr. Wapang (MO) AYUSH Community Health Center Changtongya ajanga anemponga ayutsüba dak sendakba inyakyim indang iba senden nung süoka jembi. Iba senden nung village council chairman tem, Changtongya Town kübok aliba ward ajak indang chairman tem aser GB tem dena liasü. Maneni anendaka alirtem arutsüpur tsürbur aser kinunger adianutem dang anempongba mapang amshitsü asoshi pei sasa bedding/toiletries bener arutsü metetdaktsü.