Changtongya nung COVID-19 awareness sentong agi

Dimapur, Metsüremi/March 12 (TYO): Changtongya Town Hall nung March 12, 2020 nü novel coronavirus indang awareness sentong ka Senior Medical Officer (SMO) Community Health Center (CHC), Changtongya ajanga ayongzüka agi.
Iba sentong nung jembiba mapang Dr. Jungshi S. M. O CHC Changtongya ajanga ashiba agi, coronavirus dang COVID-19 ta ajar aser iba ya alima tesem ajunga nung prokshiba wara ka kümogo ta World Health Organization ajanga sangdongogo.
Iba tashidak nungi jenbua alitsü asoshi tajungtibaji physical contact malitsüla kechiaser iba tashidak ya nü tenük, tebang aser teni nung kongshiba nungi tenzüker, ta pai ashi. Teka agi salemtepba nungia iba tashidak ya menateper, anungji teka amtepa salem mesüi teka ayiplokja mesüra tekolak arakzüba yimyatem asenoki amshitsüla, ta Dr. Jungshi-i ashi.
Changtongya sub-division kübok coronavirus poktetba nungi jenbua alitsü asoshi asenok kanga junga renemshia alitsüla, ta paisa ashi.
CHC Changtongya nungi nurse, Asangla Mar ajanga iba sentong nung ashiba agi, coronavirus tashidak keta alirtem akettsü, tekolak angutsü, temang metatsü aser hajitsü. Asenoki aketba aser hajiba mapang tebang nembangtsüla aser teti sapon agi teka shidoktsüla, ta lai ashi.
Laisa ashiba agi, coronavirus tashidak keta lir südi ta temulung melemi bilemba nisung ya anogo 14 isolation ward nung anepalutsüla, aser iba tashidak atema mozü tejangja mali.
Iba awareness sentong ya SDC (C) Changtongya, Moakumzuk Tzudir menden sür agi aser pai tepela ankep o jembi. Paisa lokti tentet balala dang coronavirus nungi jenbua alitsü osang sangdongtsü ajungshia liasü.