Changtongya Volleyball Association-i Dr.Imkongliba memorial volleyball trophy kokogo

Champion- Changtongya Volleyball Association den Sharingain Longkumer aser host Temjen Imna Along Longkumer nunger tangokba noksa nung angur.

Dimapur, Yimpoksüi/November 22 (TYO): Changtongya Volleyball Association-i Dr. Imkongliba memorial volleyball asayamung final asaya nung Sumi Games and Sports Association koka takok marok benogo. Iba asayamung ya Dimapur Government College ground nung Hokolbar aonung tembangogo
Final asaya nung Changtongya team-i 27-25, 25-18, 25-22 agi Sumi Games and Sports Association madak takok angu.
Asayamung akoker nem senpet sen 1,20,000 den takok marok agütsü aser Runners Up team nem senpet sen 75,000 den takok marok agütsü. Maneni semifinal nung tamakok anguba team ana nem senpet sen 20,000 (team shia) agütsü.
Semifinal asaya nung Sumi Games and Sports Association-i 3-0 agi Trinity Club Kiruphema akok aser Changtongya Volleyball Association-i 3-2 agi Mh10 Kohima akok.
Jurila senpettem rongnung Changtongya Volleyball Association nungi asayar Limadangit nem Best Spiker award aser senpet sen 10,000 aser Trinity Club Kiruphema nungi asayar Mengoselie nem best setter award den senpet sen 10,000 agütsü. Maneni Sumi Games and Sports Association nungi asayar Kito V Zhimomi nem player of the tournament naroküm den senpet sen 10,000 agütsüogo.
Iba asayamung ya Japukong Youth Organisation-i ayongzük aser Technical Education and Tribal Affairs minister Temjen Imna Along Longkumer-i host asü. Asayamung nung team ajak agi 9-i shilem agiogo.
Asayamung shibangba sentong nung alakteta jaoker ka ama o jembidang Nagaland Legislative Assembly, Deputy Speaker, Sharingain Longkumer-i, iba asayamung ya tatembang masü saka tetenzüker asütsüla ta ashi. Paisa, asayamung ya Japukong tzükong dak dang merangloki Naga nunger ajak sentepa longjemba sabang ka südaktsütsüla, ta ashi.
Paisa, Dr. Imkongliba mapa aser pai ajangtetba tem indang lemsatepba den sentepa aliba lokti ajak dang pai bendanga agüja inyakba bilemtettsü aser yimya tajungtem angazüka benshitsü mepeshi.