Changtongya yimdak jana agi tagitsü oset yanglutsü sayu

Mokokchung, Metsüremi 10 (TYO): Tamagitsü oset aser janaona agi tagitsü oset balala yangluba exchange programme- Swachh Shakti Week Metsüremi 10, 2018 nü Changtongya yimdak agiogo. Mission Clean Drive (Ungma) aser yimdak tetsürtemi exchange programme nung shilem agi.
Iba sentong ya PHED, Mokokchung Division-i ayongzük aser WSSO Kohima, Nagaland-i sponsor süa Community Hall, Changtongya yimdak agi.
Sentong nung jembidang Mokokchung Executive Engineer PHED, N Yanger Pongen-i, India temerükba akumtsü mapatong nung tetsürtem shilem nung rangloker Swachh Shakti Week ya amonger, ta metetdaktsü.
Paisa, tetsürtem medenibo flagship programmes aser central developmental project balala takok ngua meinyaktettsü ta India sorkari bilemer, ibayongji grass-root level nungi tetsürtem nem tashi agutsütsü atema rangloker inyaker, ta metetdaktsü.
Iba dak sendakba nung Yanger Pongen-i Changtongya yimdak tetsürtem dang iba sentong ajanga angazükba tasatemji sayuang, ta ayongzük.
Paisa, lokti temerükba akumtsü atema tetsür telok balalai inyakba nung department-i yariteptsü melunga lir, ta metetdaktsü.
Kasa sentong nung SDO, Masachuba-i, iba programme ya tamagitsü osettem agi tagitarutsü oset yanglua ki aser temekettem tebor jungdaktsütsü atema lir, ta ashi.
Paisa, tamshi dang shia amshira tamagitsü janaji hon ama asutsü, ta ashi.
Practical session nung Mission Clean Drive (Ungma)-i plastic pongdang, lisü, shidi aser süjen ama tamagitsü osettem agi naro, naro ayuba pot, doormat aser pakti ama tagitsü osettem yanglutsü sayua liasü.
Department aser Ungma nungi tetsürtemi training agutsüba atema pelaba lemsatepa Changtongya Village Council Chairman-i, item ama sentong tajung ajanga tesem nung janaona ajemba dang masü saka pei libajen merüka alitsü, ta ashi.