Changtongyai tzü atema azüngashitepba nung maden

CTN. Oct.17 (TYO) : Changtongya o Yimjenkimong na tsüngda Milak tzü dak sendakba mangatettep ken o bendangtsü asoshi NSCN/GPRN Ao Region nungi sobaliba nung ajemdaker azüngashiteptsü asoshi October 16, 2015 latettsüba shidi ka October 12, 2015 anogo nung angu, saka iba anogo matongdangyongi September 25, 2015 nü NSCN/GPRN Ao Region-i NSCN/GPRN Collective leaders nem ‘report’ renemer agüjadoker liasü ta Changtongya yimteni Deputy kilonser cum Caretaker / CAO, Ao Region GPRN dangi züluba shidi ka nung metetdaktsüogo.
“Iba ama jelia osang renemer agütsüba jagi sobaliba nung ajemdaker azüngashitepba maparen metenzükdangyongi nenoki Changtongya aitsür liasü aser October 16 nü azüngashiteptsü atema lemtetbajibo tejak meiba mapa ka dang liasü ta sayur,” ta Changtongya yimtenisa metetdaktsü.
“Iba ama jelia telemtetba agir aliba maparen nungbo onokibo telemtetba agidak shilem magitettsü,” ta Changtongya yimtenisa metetdaktsü.
Yimteni telemtetba agütsübajibo tajung, ochi aser shitak dang masü saka nübortemi asenok dang temulung melemtettsüsa malitsüla ta onokibo amanger ta Changtongya yimtenisa ashi.
” Milak ayong nung Tsümok Longok nungi Tsüben Lama tashi akhi tsürabur mapang nungi onok meyong aser kechisüdir süaka onoki iba temetenji metoktsür aser onok temetenji tamalen okadak aisü nung metentsüogo,” ta parnokisa ashi.
Yangi tamalen shia aliba kulitem ajanga Changtongya yimteni kanga sasar saka Milak nung October 16 nü ayongzükba tsürabur azüngashitepba maparen nung medentettsü aser ibaji atema nenok timtemdakja lira taidok meshir ta Changtongya yimteni October 16 nü CAO, Ao Region, NSCN/ GPRN dangi züluba shidi ka nung metetdaktsüogo.