Charlottesville nung lendong adok; Trump aitsür

Charlottesville, August 13 (Agencies): Charlottesville nung longkak aiter telok ka anema telok kati longkak aitba mapang gari kati item longkak aiter dak atsük aser iba lendong nung tetsür ka asü aser 19 yiru.
US Civil War mapang alar samadaktsütsü asoshi nokdaker mitkar tanishir ka indang kerak yanglu agienba ajanga Honibarnü white nationalists temi “United the Right” sentong ka ayonga yimdong nung noklang aika jajaba mapang iba lendong ya adalok. Neo-Nazis aser Ku Klux Klan züngsemtemi longkak aitba anema longkak aiter den mangatettep adoka raratep.
Iba rally ya senshiba mapang longkak aiter anema longkak aiter aliba tesem leni gari ka oa nisung aika dak atsük aser arishi küm 32 tain, Heather D Heyer ya tsükset, ta Charlottesville Police Department ajanga ashi.
Iba gari anisang ya Ohio nungi arishi küm 20 tain James Fields, ta jangjaogo aser pa ya police temi pua lir.
White supremacists shirnok Charlottesville-i arua ali, ni nünok dang ashitsü ajak agi “Kidangi oang”, ta Virginia angh, Terru McAuliffe-i ashi.
US tir menden-i Donald Trump atuba ajanga US ajunga nung item far right telok ya tashi tali itshidaktsür südi, ta nisung aikati ashir.
“Tesembatep aser telemsa ya tangsa anentsüla. Asenok ajak America nunger ama temeim agi asen linük asoshi nokdanktsüla,” ta Trump-i osangbener dang ashi.
Saka tir-i white extremist telok ya maitsü, ta nisung aikati ashir.
“Parnok dang ya temenen ta ajatsüla. Parnok ya white supremacists aser iba ya kilung nung kiralongra mapa inyakba lir,” ta Republican Senator Corey Gardner-i Twitter nung Trump tenüng amshia zülutsü.
US Republican aser Democrat telok nungi züngsem aikati Trump-i aitsüba nung temolung masü aitsüba osang sangdonga lir.