CHC Changtongya nung world malaria day amung

Dimapur, Rongchii/April 25 (TYO): Health & Family Welfare Department Nagaland, Community Health Centre Changtongya puri April 25, 2019 nü “zero malaria starts with me” omen nung ajemdaker Changtongya jila local ground nung world malaria day nüngtem nung sentong ka ayonga kaogo.
Sentong nung jembidang ‘Ayush’ Community Health Centre Changtongya, M.O, DR. Temsuwapang-i, ramen tashidak atema azü CHC Changtongya nung tendangtettsü, ta ashiba den nüburtem dang iba maoangka agitsü ajungshi. Paisa iba tashidak ya manepba tashidak ka masü ta ashi.
Dr. Wapang-i, sentepa aliba lokti aser kaketshirtem dang ramen tashidak indang tangazüktsütem prokshitsü aoshi ayongzükba den kaketshirtem ya department ambassador tem lir ta ashi.
Kasa mapang nung Orental high school nungi Kisangwala Lkr-i o tatsüka jembia liasü.
World maleria day amungba nüngtem nung school rally ka ayongzüka aka kong Green River Valley High School, christian Standard Higher Secondary School, Oriental High School aser GMS (A) nungi kaketshirtemi shilem agia liasü.
Iba sentong ya Community Health Centre Changtongya, SMO, Dr. Imtijungshi lenisüba kübok aka aser paisa tepela o jembia liasü. Changtongya Town Babtist church, Pastor I/c Aliba Imchen-i sarasadema sentong tenzük.
Maneni iba sentong nung office balala nung tekolaktem, ward chairman, Goan Bora, tesayurtem aser Head Master tem dena liasü, ta APRO Changtongya sangdong ka ajanga metetdaktsü.