Chekiye yimertemi tetsür pur aotsü meranger ka apu

Dimapur, August 20 (TYO): Deobar anepdang 7:30 ako meta Chekiye yimtsüng nung asangur kati tetsür chanu ka pur aotsü merangba mapang Chekiye yimertemi nisungji apu.
Tetsür chanu ka pur aotsü merangbaji Tohuto Hibo lir aser pa ya Model village, 5th mile Dimapur nung alir ta jangjaogo.
Police-i ashiba agi, Tohuto jagi mezüngbo tanutsüla dang lar medemeri la atadar ta shia mesüzüka anir aotsü merang.
Iba sülen la Sunday School nung dener kidangi meyipa aodang, Tohuto-i la tashiyim agi pa indang Gypsy gari nung anioktsü merang, saka tanutsülai ola adoka asatenba agi pa jena ao.
Iba tatalokba sülen Tohuto-ji par medemer ka den motorbike ka nung mener, pai tanutsüla anir aotsü merangba tesemi pa indang mobile phone bushia aru.
Phone ji tena atsütepdang tsükba liasü. Ajisüaka, Chekiye nung alirtemi Tohuto apu aser pa maitsüji tanutsülai jangjatsü. Iba sülen village council-i pa Dimapur women police ket nung agütsüogo.
Tanutsüla tebui Dimapur women police station nung tim mesüi kongshitsü, tashiyim agi shi nung medemtsü, tepsettsü aser pur aotsü merangba ken o tem nung ajemdaker FIR ka benokogo, ta PRO Dimapur-i metetdaktsü.