Chelsea PL asaya 11 buba atonga akoker telok akümer

London, December 17 (Agencies): Spain nunger striker, Diego Costa-i takokba goal agüja, par Chelsea teloki goal 1-0 agi Crystal Palace telok madak takok ngua asayaba sülen par Chelsea telok 2016-17 Premier League (PL) asayamong asaya 11 buba atonga akoker telok tanü, Honibar nü kümogo.
Chelsea teloki tan takok anguba sülen ajak agi points 9 ajangzüker telok küma, Liverpool aser Arsenal telok na den temaba jenjang ngua, tan asayamong nung shilem agir telok tarensen nung temaba jenjang angur telok akümer lir.
Tanü asaya tenzüker minute 37 buba nung Costa-i külem asayar, Cesar Azpilicueta-i renemtsüba cross ball agizüka, pa tekolak agi takokba goal-ji tongokja liasü.
Tanü goal agütsübaji Costa-i tan asayamong nung ajak agi goal 13 buba takok ngua agütsür lir.
Ajisüaka, Costa-i asaya 1 nung shilem magitsü temerenshi agizüka aliba yong, par Chelsea teloki Bournemouth telok den tan December ita 26 nü asayatsü lemzükba asaya nungbo pai toktepa shilem magitettsüsa jenjang ajurua lir.