Chemical raraba osettem ajaki aitsütsüla: India

New Delhi/United Nations, October 23 (Agencies): India-i alima linüktem dang, Non-State Actors (NSA) aser kiralongrar teloktemi chemical raraba oset bushiba aser amshibaji mita alitsüla aser item ama raraba oset amshibaji ajaki aitsütsüla, ta ashi.

“Kong südir mesüra shirnok südir süaka chemical raraba oset amshitem ajaki aitsütsüla aser International temzüng ajanga chemical raraba oset amshiba anemba nung kecha temelenshi malitsüla,” ta yashi Brihostibar nü United Nations General Assembly First Comittee senden nung teraksatsüba jenti aliba onük nung o toktepba mapang MP, Abhishek Banerjee-i ashi.

Paisa, Syria-i chemical raraba oset bendenba raksatsüba, UN kübok Organisation for the Prohibition of Chemical Weapons (OPCW) aser International-i merangba nung India-i shilem agiogo ta ashi.

“International linüktemi maneni NSA aser kiralongrar teloktem-i chemical raraba oset bushiba mesüra amshiba mita reprangtsüla,” ta paisa ashi.

Chemical Weapons Convention (CWC) tongtibangtiba nükjidongji chemical raraba oset mamshitsüla, anungji chemical raraba oset aliba tanüngba linüktemia tekaraba nung pei teinyaktsü shilem inyaktsüla.

CWC-i mapang latetja aliba ama 2009 küm India-ia linük indang chemical raraba oset bendena aliba raksaogo.

“International yimjung aser security tsütsü tayongzükba nung ajemdaker item ya inyaktsü nüngdak ta bilemer, iba nungji kiralongraba mapa inyaktsü atema biological agents mesüra toxin bushir kiralongrartem aser non-state actors densema lir,” ta paisa ashi.