Chennai hospital ka nung light maliba ajanga 18 süogo

Tzünglu kanga sashia aruba ajanga tzümetsüng agi kongshiba yimti, Chennai nung nüburtem timtemtepba noksa nung angur. NDRF-i kümzükba maparen densema teyari mapa balala inyakdar. Parnoki NDRF team ano tali yoka tang tashi nung nisung 10,000 dak tema kümzükogo. MIOT hospital nung light maruba aser oxygen cylinder agi anüngba ajanga Hokolbar anepdang ICU nung nisung 18 tashi süogo. (Chennai, December 04, 2015)

Chennai, Dec. 04 (Agencies): Tzümetsüng lendong tulu ajurua aliba Chennai yimti nung hospital ka nung electricity maliba ajanga Hokolbar anepdang ICU nung nisung 18 tashi süogo.
Osang ajanga ashiba agi, shiranger kar Madras Institute of Orthopaedics & Traumatology (MIOT) Hospital-i anir aru, ajisüaka electricity maliba ajanga parnok nisung 18 süogo.
Tamil Nadu Health Secretary, J Radhakrishnan-i, “Kanga mejungi shiranger nisung 57 mozüki balalai bener ao, parnok rongnung nisung 18 asü. Parnok asüba kulitemji tang tashi mejangja aser bushisüngdang tagidak lir,” ta ashi.
Paisa, “Tzümetsüng tenzükba mapang nungi tenzüka MIOT Hospital nung shiranger 575 anepalua liasü, iba mapang nung tajemba agi shiranger 75 oxygen agia liasü,” ta ashi.
Sorkar tsütsü nungi tashimait maliasü ta shia pai, ”Asürtem atema onoki mangyimer. Shiranger ajungaji light maliba aser oxygen failure ajanga asübabo masü. Onok tsütsülen nungi tashimait mali,” ta ashi.
Osang kar ajanga angazükba agi, MIOT hospital building mezüng tamentep nung tzü atsünga alidak generator aliba ajanga ibaji metsüklokteti shirangertem oxygen failure atalok.