Chennai nung ita ka tsüngda Naga lanur 2 asü

Dimapur, April 3 (TYO) : Ita ka tsüngda Chennai nung tatalokba balala nung Naga lanur ana taküm samaogo. April 3, 2017 nü Z. Akiu Yimchunger asü aser pa mang Chennai nung remogo, ta NCF Chennai aser NSUC-i sangdong ka nung metetdaktsü.
Pa ya Sriperumbudur nung private company ka nung inyaka liasü aser mapang tatsüka shirangba sülen asü.
Ano, March 13, 2017 nü private company nung inyaker Naga tsür ka mapang tatsüka shirangba sülen asü.
Nagaland nungi lanur 250 shi Chennai yimti aser temeket nung unorganized sector nung mapa inyaker. Parnokji security guards, labourers, restaurants helpers, bakery workers, beauty parlours, spa workers, sales men & women amala mapatem inyaker.
“Naga lanurtem aika tepetzük tia nung alir aser ano temang nung timtem adoktsüsa mapa inyaker aser chiyungtsü peria mongui timtema alir. Kümshia lanurtem asür aser sensaker kibongtem nungi lanur mang karbo Nagaland-i bener mouteti Chennai nung dang aremer. Iba atema Chennai nung aliba Naga nungertemi teyari agütsütsüsa akümer aser iba nung sen aika endoker” ta sangdong nungsa shia lir.
Lanur aikati NCF Chennai (Naga Christian Fellowship Chennai) aser NSUC (Naga Students Union Chennai) nung tenüng züluoka mali aser parnok talidaka dena memetetdaktsür. Iba jagi lendong-tsüdong ajurudang tetsükdaktsü ajurur. Nisung million aika aliba yimti ka nung nisung bushitsübaji kanga tasak lir.
Nagaland nung tsüraburtemi züngpeter aliba tanurtem yimtitemi mashii meyoktsü metetdaktsür. Tamasa osang tejangja metetpelaba den yimti nung aliba Naga nunger teloktem den asüngdangyaba sülen ang pei chirnurtem yoktsüla, kechiyong aiben timtem aser takoksa ajurur, ta NCF Chennai aser NSUC-i sangdong nungsa metetdaktsüogo.
Maneni, NCF Chennai aser NSUC-i Nagaland nung aliba kin teloktem, arogotem aser civil society temi yimti balala nung aliba lanurtem bushia Nagaland-i anir aotsü atema mapa inyaktsü mepishia shisem.
Taküm küm tenzüker nisung 5 tashi Nagaland-i meyipa yokogo. Iba mapa nung yariteptsü atema kibong aser teloktemi Pastor Wapangtoshi, NCF Chennai (09840127998) aser Chingmak Chang, Vice President NSUC (07401780461) na den tongteprateptsü metetdaktsü.
Chennai nung Nagaland House mali, anungji yimti nung aliba Naga nungertemi Nagaland sorkar dang tekaratiba nung Nagaland House ka yanglutsü atema mepishia metetdaktsür, ta parnokisa ashi.