Chennai nung Naga nunger aika timtem nung lir

Dimapur, Rongchii/April 14 (TYO): COVID-19 prokshiba nungi nokdangtsü mechi linük ajungalen shibanger aliba mapang Nagaland sorkari Nagaland CM’s relief fund for COVID-19 nungi sen lakh ka Chennai telungzük aser temeket nung aliba Naga nunger pei kidangi moteti timtema alir nem agütsü, ta Nagaland in-charge Covid-19, Chennai aser Pastor, Naga Christian Fellowship Chennai aser North East India Welfare Association Chennai (NEIWAC) tir, Wapangtoshi aser Naga Students’ Union Chennai tir, Chibenthung nati sangdong ka ajanga ashi.
Iba sen nungi onoki Nagaland nungi pei kidangi moteti timtema yimti nung aliba nisung 205 nem teyari balala agütsü, kong nisung 126 nem jang-o-tzü aser nisung 79 nem sen 1,000 agütsü. Ano maneni Nagaland nungi nisung aika Chennai nung timtema lir, kechiaser parnok mapa nungi anener assert kaket rejutem shibanga lir.
Nagaland Chief Minister Neiphiu Rio, C Shanavas, Principal Director, School Education Department aser Asale Lese, Under Secretary, Government of Nagaland nungertem ajanga item teyari agütsüba asoshi parnok dang pelar, ta sangdong ajanga ashi.
Parnoki ashiba agi, Nagaland CM Relief Fund nungi sen teyari agütsüba ajanga Chennai nung timtema aliba Naga nunger nem teyari agütsüba osang tejangja Nagaland sorkar nem April 14, 2020 nü agütsüogo. Chennai ya ‘red zone’ ka asünung Nagaland nungi kaketshirtem aser ‘unskilled worker’ tem anogoshi tali tali tim atemer, anungji ano maneni Nagaland state sorkar aser temulungertem nungi teyari agütsütsü imla atar, ta sangdong ajangasa ashi.