Chennaiyin FC Head Coach asütsü Owen Coyle shim

Chennai, Luchii/December 4 (Agencies): Indian Super League team Chennaiyin FC puri Bodhbarnü taoba Burnley aser Bolton Wanderers manager Owen Coyle, season matem tashi parnok indang head coach tasenba asütsü asoshi shimogo.
Arishi küm 53 tain coach yagi England nunger John Gregory melenogo, shibai Honibarnü club toktsüogo. Tanga asayaa aliba ISL asayamung nung par team-i junga masayatetba sülen pai coach mapa toktsüogo.
“Head Coach ka ama Chennaiyin FC nung adenba atema ni kanga pelar. Onok team asayar tajung aika lir aser parnoki junga asayatsü asoshi tejangraba lir. Kasa mapang nung onok pusemertema aika lir. Ni iba club nung mapa inyak tenzüktsü matateter,” ta Coyle-i ashi.
CFC head coach Coyle, mezüngbuba December 10 nü Jamshedpur FC nung oa asayatsü.
Pa taoba mapang English premiership teams- Burnley aser Bolton Wanderers coach ama inyakogo aser iba mapang pai 2009 küm Burnley pur second division nungi Premier League-i anir atu.
“Owen (Coyle) ya British football nung kanga nüngtugu lir aser pa coach aser asayar ka ama career kanga takok nung aruogo. Pa onok den adenba atema kanga pelar.
“Pa den sensaksemba sülen onok kanga temulung alemer aser pai team tanaben asendenshir asayaba nung teyari agütsütsü ta amanger,” ta Chennaiyin FC co-owners temi ashi.
Coyle asayaa aliba mapang English Premier League nung Bolton Wanderers den Dundee United aser Scottish top flight nung Motherwell nungi striker ka ama kanga takok ngua asayaogo.
Pa Scotland nung aso saka Ireland nungi jakzükba nisung ka lir. Coyle asayaba mapang goal 300 dak tema idaktsüogo aser international jenjang nung Republic of Ireland nungia asayaogo.
Chennaiyin pur tang ISL table nung jenjang tekububa nung lir. Parnoki asaya trok nungi point pongu dang nguteter lir. Tang tashi nung parnoki asaya ka dang koka lir.