Chennaiyin FC-i Indian Super League takok marok nguogo

Margao, December 20 (Agencies): Deobarnü Chennaiyin FC-i FC Goa goal 3-2 agi akokba ajanga parnoki Indian Super League (ISL) takok marok agizükogo.
ISL tanabuba season tembangba tatembangba asaya kanga dang jangratemtsüka liasü aser iba asaya nung goal asembo asaya tembangtsü minute 4 dang lia agüja liasü.
Taküm asayamong nung asaya 60 liasü aser goal ajak agi 186 agütsü. Yaküm asayamong nung goal 121 agüja liasü.
Taonung Jawaharlal Nehru Stadium, Goa nung final asaya tenzüker minute 54 buba nung Chennaiyin asayar, Bruno Pelissari-i mezüngbuba goal agütsü saka goal agütsüba sülen minute pezü tsüngda nung Thongkhosiem Haokip-i goal ji küpdok.
Minute 87 buba nung Joffre Gonzalez-i Goa atema goal ka agütsüsem aser iba jagi parnoki asaya akoktsü ama bilem, saka minute 90 buba kanga dang tesasatsü ka atalok aser ibaji Goa goalkeeper Laxmikant Kattimani-i par tsütsüi goal ka yokba liasü.
Kattimani-i goal yokba ajanga kasasa aküm aser extra time asayatsü tenzüker mezüngbuba minute nung Chennaiyin striker, Stiven Mendoza-i goal ka agütsü aser ibaji ajanga parnoki asaya akok.
Taonung asaya reprangi arurtem rongnung Indian Test cricket team captain & Goa co-owner, Virat Kohli aser pa tetong Anushka Sharma; Chennaiyin telok kibur, Abhishek Bachchan aser ISL chairperson, Nita Ambani nunger liasü.
Tanabuba Indian Super League (ISL) takok angur nem sen crore 8 aser tanabuba jenjang angur nem sen crore 4 senpet agütsü. Anosa, semi-final tashi atur telok anaprong nem sen crore 1.5 agütsütsü.
Colombia nunger Mendoza-i ‘player of the tournament’ agizük aser paisa goal timba agütsüba atema Golden Boot Award angu. Tan asayamong nung Mendoza kijai goal 13 tashi agüja liasü.