Chennaiyin FC telok ISL asayamong final-i iogo

Kolkata, December 16 (Agencies): Chennaiyin FC teloki Atletico de Kolkata telok den jenjang tajungba ngua tang tasayadak Indian Super League (ISL) football asayamong final nung shilem agitsü jenjang tanü Bodbar nü nguogo.
Tanü semifinal tanabuba shilem indang tanabuba asaya nung Chennaiyin teloki goal 1-2 ngua tamakok ajuru saka par teloki ajak agi points 4-2 ngua tan asayamong final nung shilem agitsü jenjang tajungji ajangzük.
Semifinal tanabuba shilem indang mezüngbuba asaya nung goal 3-0 agi Atletico telok madak tan December ita 12 nü akoker, Chennaiyin teloki FC Goa telok den tan December ita 20 nü final asayatsü.
Taoba asaya nung goal 3 agi tekübokba jenjang angur, Atletico asayartemi tanü takok angutsü alizüng tulu yur tetenzük nungi kanga junga asaya aser par asayar, Dejan Lekic-i asaya tenzüker minute 22 buba nung par telok asoshi mezüngbuba goal agütsü.
Ajisüaka, Iain Hume-i asaya tenzüker minute 87 buba nung goal 1 agüja par Atletico telok nem agütsüba goal-ji meyiptsü.
Yamaji asayar külen, Atletico substitute asayar, Fikru Teferra-i asaya tenzüker minute 92 buba nung goal 1 agüja par telok temaba jenjang nung ajungketja par Atletico telok nem tanü takok bener arutsü.