Chepoketa Students’ Union pur küm 50 Jubilee among

Kohima, Luchii/December 21 (TYO): Brihostibarnü Phek District nung Tizu kübok aliba Chepoketa Students’ Union (CSU) pur Golden Jubilee mong nung tetushi tejaokerji MLA, Kuzholuzo (Azo) Nienu liasü, ta tanü ketdangsertem osang ka ajanga metetdaktsü.
Iba sentong nung jembidang Azo-i, Chepoketa Students’ Union tenteter küm 50 abensaba ajanga nenoki putiotsü nung alizüng ka atonger, ta metetdaktsü.
Paisa, “Jubilee ya benjungmong mapang ka, tai tokteptsü, atsü-anemtsü aser temoatsü mapang ka lir. Benjungmong amongba shiaji takok anguba otsü kaka lir, ajisüaka taoba mapangtem nung takok anguba nüngsang dangbo penzüa malitsüla,” ta ashi.
Paisa küm 50 abensaba atema Union tenzükertem aser menden balala nung Union tenzüka arurtem nem tenüngsang agutsü.
“Atangji, benjungteptsü atema kuli lir, kechiyong Union-i Vejoi Vero ama yimtenren nung nüngtugu nisungtem, taoba mapang minister, doctors, engineers aser ketdangser aika adokdaktsüogo,” ta pai ashi.
Kaketshirteji yimtsüng atema senti, ta shia pai kaketshirtem dang maneni tarutsü nung temaba jenjang alangzüktsü ajungshi.
Paisa lanurtem dang, kaketshir ka asüba mapang nung social media amshiba ajanga takoksa balala anguba aser social network tim mesüi amshiba ajanga lendong bener aruba indang tekümdangtsü metetdaktsü.
Pai kaketshirtem dang Lai o nungi, “Saka tamasa nenoki Tsüngrem yimli aser Pa temeshiba bushiang aser ajakji nenok nem bendenloktsütsü” ta shia, küm 150 jakdang Naga nunger dangi tamasa Khristan yimsü aru, iba sülen shisaliok tenzük, ta shisem.
Pai kaketshirtem dang, taküm nung takok angutsü atema tazüokba nung alitsü ayongzük.
Iba Jubilee mong ya “Excelsior: Ever Upward,” omen nung ajemdaker agi, FGN Kedallo Zhopra Vero, Chakhesang Students’ Union president Lavoto Chizo, District Programme Officer (Dimapur) S. Nezolu Rhakho, Chepoketa village council chairman Thiipurayi Vero aser Zhodiiyi Vero nungeri salem osang lemsatepba den CSU president Miileto Veswii-i Tir onük jembi.
Iba sentong nung o jembitsü jaokertemji Rev.Dr. Vezopa Tetseo, executive secretary Chakhesang Baptist Church Council aser Rev. Pukrolhii Lohe, pastor Yoriiba Baptist Church na liasü. Rev. Dr. Vezopa Tetseo-i Golden Jubilee souvenir meshitetja liasü.