Chessore area GBs Union küm 25 jubilee amunger

Dimapur, January 27 (TYO) : Chessore area GBs Union pur küm 25 ajungba nüngtem nung January 27-28, 2016 tashi Shamator ADC headquarter kübok Chessore jila nung benjung amunger.

Iba benjung lapokba sentong nung tongti tesemdangerji Municipal Affairs, Economics & Statistics Parliamentary Secretary, R. Tohanba liasü.

Tongti tesemdanger o jembidang Tohanba-i iba tesem nung GB tem dang sobaliba temzüng-ozüng kümzüka ayur shisakartem asütsü ayongzük.

“GB temi kanga dang shisakaa telemtetba agitsüla aser nübor nem tim temeten agütsütsüla. Asen Linük Temzüng nung arrla 371 (A) ajanga Naga nunger nem tashi balaka agüja lir, anungji asenoki iba ya tim mesüi mamshitsüla saka alima dang Naga nunger ozüngren sayutsüla,” ta Tohanba-isa ayongzük.

Paisa, nübortem dang pei pei temeket nung aliba yimtsüngtem aser kintem den yimjung aser tesünep nung alitsü merangtsüla ta ayongzük.

Iba sentong nung Chessore Village Baptist Church sannüker Rev. Kumkiuba-i temaotsü meshia sarasadem aser tongti tesemdangeri Silver Jubilee nüngshilung sayatsü.