Chessore nung Tohanba-i Medumneo benjungmung nung aden

Tuensang district kübok Chessore yimtsüng nung Medumneo benjung amungdang Economics & Statistics & Municipal Affairs Parliamentary secretary, R. Tohanba, Municipal Affairs Director, Zambemo Ngullie aser Municipal Affairs EE, Er. Toba Angami nunger yartsüngsangertem den külemi tsüngsangba noksa nung angur.

Dimapur, August 10 (TYO) : Economics & Statistics, Municipal Affairs Parliamentary secretary, R. Tohanba-i Hombarnü Chessore Village Public Ground nung ayongzüka amungba Medumneo benjung nung tongti tesemdanger ama shilem agi.
Medumneo benjung ya Yimchunger Naga nunger atema benjung tongtiba lir.
Tohanba-i benjungmunger ayongzüka jembidang, iba benjung ajanga kati ka den tesentaktep yanglutsü aser ka küma longjemtsü ashi.
Paisa, Yimchunger nunger dang tanga kintem den medemer yimteptsü aser tejakleni aotsü atema parnok dang nungi temoatsü meshitsü ayongzük.
Tawa tu India sorkar kübok Ministry of Road Transport & Highways-i Yimchunger nunger litsü ajanga National Highway tasen ka yanglutsü metetdaktsüogo, ta Tohanba-isa ashi.
Iba NH tasenba ji kilometer 200 shi lir aser iba lenmang ajanga Showuba- Guzunyu- Pughoboto- Aghunato- Shamator- Noklak- Pangsha ajangtsü, ta paisa shisem.
Iba lenmang tasenba yangluba mapa nung Chessore nungertemi bangdakpurtem den yariteptsü mepishir, ta Parliamentary Secretary-isa metetdaktsü.
Sentong nung Municipal affairs director Zambemo Ngullie, Yimchunger Tribal Council vice president Throngso Yimchunger, head GB Chessore village aser Fr. Francis Yimso nungertemia o jembi.
Sentong nung mendenji Chessore Village Council chairman L. Chuba liasü, GB K. Lakiumong-i tesentepertem pela agizük, K. Throngkiuba-i Medumneo teratet metetdaktsü aser Public Forum Chessore Area President A.Akhum-i anküp tepela o jembi.