Chessore nung training sentong aser free medical camp aka

Dimapur, Aenjeti/January 22 (TYO): Shekinah Christian Foundation-i achayanga January 20 nungi 22, 2019 nü tashi Chessore council Hall nung chiyongtsü meraksai bendena aser wazüka ayutsüba training program ka den repsema Free Medical camp ka anogo asemnü kaogo.
Anogo asem tashi training sentong nung shisalen agütsür Orenponi Humtsoe liasü aser lai Chessore Block kübok yimtsüng ajak nungi Self Help Groups 120 nung züngsemtem nem tesayuba balala agüja liasü. Lai chiyongtsü meraksai bendena aser wazüka ayutsü asoshi aser pickle o chips yanglutsü atema sentong nung adener tetsürtem dang sayua liasü.
Kasa mapang nung 45 Assam Rifles puri temang angati agi reprangtsüba den health awareness sentong ka Chessore block nung aliba nüburtem atema ayongzüka aka, kong iba temeket nung aliba nüburtem aika temang angati agi reprangogo. Maneni sentong nungsa 45 AR Commandant, Col. Mohit Singh-i teshimtetba pur kar nem solar lamp aser asaya balala nung amshiba osettem lemja liasü.