Chetheba nung SHG indang Friday Bazaar ka tenzükogo

Kohima, Luroi/August 27 (TYO): Department of Rural Development- Nagaland State Rural Livelihood Mission (NSRLM), BMMU, Government of Nagaland kübok Self-Help Group (SHG) indang weekly Friday Bazaar ka Phek district kübok Chetheba Town nung August 27, 2021 nü Extra Assistant Commissioner (EAC) Chetheba, Er Omegali ajanga lapoktsüogo.
Iba bazaar lapoktsüdang sentong tatsüka agiba nung jembiba mapang EAC ajanga tetsürtem dang sen aazüktsü mapa inyaktsü ajungshi aser kibong aser loktiliba nung tetsür temi shilem agitsü indang jembia liasü.
Block Programme Manager (BPM) Senovielhou Koza-i sentong nung jembiba mapang, NSRLM indang nükjidong tulutibaji farm aser non-farm sector nung makamaiter takum jenjang ajungkettsütsü ya lir, ta ashi.
Kibong shia rongsen jenjang asadangba sülen kija/kibong mesüra telok nem DAY-NRLM ajanga teyari agütsür, ta pai ashi.
Iba sentong nung Chetheba Town indang Head GB, Motahu Rokha-i lokti ayongzüka liasü aser iba sentong nung Area Coordinator, IBCB Vekouto Kezo menden liasü.
Sentong tenzüka Chetheba Town Baptist Church nungi pastor Vesupra Tetseo-i sarasadem aser sentong tembanga CRC Chetheba Town pastor Rudupra Nienu-i sarasadema liasü.