Chetheba yimdak anogo 5 nü aluyimertem training temogo

Dimapur, June 18 (TYO): Central Institute of Horticulture (CIH), Medziphema den District Horticulture Office, Phek senteper Phek district atema aluyimertem asoshi anogo pongunü training Chetheba Village nung ayonga akaba sülen May 30, 2017 nü tembangogo.
Iba training tetenzük sentong nung tongti tesemdanger Vety. Asstt. Surgeon, Chozuba, Dr. Menguzenuo Chielie-i nisung aser shiruru naprong atema horticulture chiyungtsüji koda tongtibang, iba indang lemsatepa liasü.
Laisa aluyimertem dang mixed farming ayimtsü ajungshiba den külemi sustainable development atema meranga inyaktsü ajungshia liasü.
Technical session nung CIH nungi Asstt. Horticulture Specialist, Shisarenla Aier-i CIH-i inyakba mapa balala metetdaktsü aser institute-i agütsüba skill development course balala atema aluyimertemi tenüng agütsütsü pelashishia jaok.
Laisa Chetheba tesem nung somomo/mongu tsünütsü ajungshia liasü.
Ano horticulture department nungi shisalen sayur Horticulture Officer, Phek, Senti Longchar (DK)-i, Chetheba tesem nung motram (guava) tsünütettsü, kechiyong iba tesem ya iba süngjang atema tzü-mopung aser ali tapet lir, ta metetdaktsü.
Shisa lemsatepba aser o lemtepba mapang nung aluyimertem tenteti chiyungtsü akongba aser process asüba unit indang metetnüa asüngdanga liasü.
Phek Farmer’s Union (Chetheba Unit) secretary-ia aluyimertemi inyakba mapa balala metetdaktsüba den külemi department dang sensaker aluyimertem ajangzüktsü atema akokba lenmang ajak agi aluyimertem yaritsü mepishia liasü.
Pfutsero Govt. College-ia CIH aser DHO Office Phek dang Floriculture atema special training programme ka agütsüba atema pelaba metetdaktsü.
Yimtsüng balala aser institution balala nungi shilem agir parnok nisung 250 nem certificates agüja iba sentong tembanga liasü.