Chhatrasal Stadium nung nisung tepsetba ken o nung Sushil aitsüogo

Luroi/August 2, 2021 (Agencies): Chhatrasal Stadium nung nisung tepsetba ken o dak sendakba nung Sushil Kumar tia tamajungba nung tamajungba küma odar, shiba tang tepuokdak yua lir. Pa Sagar Dhankar tepsetba ken o nung aija puoka lir.

May 4 aser 5 aonung Sagar aser par medemer ana dak stadium nung kanga mejungi azük. Iba sülen airshi küm 23 tain Dhankar mozükidang asü. Iba sülen Delhi Police-i Sushil atsüker aliba bushia oa apu.

Tang Delhi Police-i nisung tepsetba ken o nung 170-page chargesheet ka benokogo, kong aija alirtem rongnung tongtibagji Sushil Kumar ta sangdongogo. Pa nisung tepsetba, culpable homicide aser nisung pur aoba dak sendakba nung aija lir.

Police-i, Sushil Kumar ya aija alirtem rongnung tongtiba aser nisung tepsettsü atema pai tasa asa liasü, ta ashiba den electronic kuli balala ajanga pa aser pa nem teyari agütsürtemi Dhankar dak azükba ngutetogo, ta ashi.

Wrestler Sagar Dhankhar, Chhatrasal stadium nung May 4-5 aonung tepsetba ken o nung aija, Delhi Police-i May 23 Sushil den ken o nung aija alisang Ajay Kumar Sehrawat na apu. Tang tashi nung pa police aser judicial custody nung anogo 10 aser 23 yuogo. Ketdangsürtemi ashiba agi, Olympic nung medal anaben tashi koker alisang ya anogo 20 shi jenshia senzüa liasü.

Iba tatalokba dak sendakba nung Sushil Kumar densema nisung 10 puogo.

Sushil tang tepuokdak Tokyo Olympics reprangdar. Kumar indang okatsüri tepuokdak ketdangsürtem dang mepeshiba sülen Tihar jail nung television ka anepalutsüogo.

“Onoki tangar den külemi Sushil television reprangtsü atema temelaba agütsüogo,” ta Delhi prisons director general Sandeep Goel-i osangbenertem dang ashi.