Chhattisgarh kübok Bijapur nung CRPF sepai asem khaset

Bijapur, June 28 (Agencies): Hokolbarnü Chhattisgarh nung Bijapur district kübok Keshkutul area nung security sepaitem aser Maoists telungpur na tsüngda khatepba mapang nung Central Reserve Police Force (CRPF) sepai asem asü, aser yimdaklir kata densema süogo, ta osang ka ajanga metetdaktsü.
Raraba tesem nungjisa CRPF sepai ka atanga asü aser sepai ana tesülen asü. Osang angazükba agi, raraba tesemlen jagi ano sepai tali yoksemogo.
199 Battalion nungi CRPF sepaitemji telungpur anema operation aoba mapang nung telungpurtemi lenmang nung mendanga atar sepaitem amak.
Asür CRPF sepaitemji – arishi küm 50, ASI/GD Mahadeva P (Karnataka, Gulbarga nungi), arishi küm 52 ASI/GD Madan Pal Singh (Uttar Pradesh, Aligarh) aser arishi küm 47, Saju O P (Kerala, Idukki) nunger lir, ta jangjaogo.
Sepaitem aser telungpur na tsüngda khatepba tesem jagi pick-up van gari ka arua gari nung mena alir yimdaklir ka khaset.