Chhattisgarh nung Assembly election mezüngbuba shilem agiogo

Raipur, Yimpoksüi/November 12 (Agencies): Maoists telungpurtemi assembly election nung shilem magitsü amokmerenaka tanü Chhattisgarh nung assembly election mezüngbuba shilem nung constituency menden 18 atema election agia nikongdang 3:00 ako tashi nung vote agütsütsüpur shilem 47-i vote agütsüogo.
Tesüiba küm 15 tashi BJP-i iba state yimsüsüa arudar.
Election Commission-i ashiba agi, tanü nikongdang 1:00 ako tashi nung vote agutsütsüpur shilem 33.86-i vote agutsür liasü aser nikongdang 3:00 ako tashi nung shilem 47.18-i vote agutsü.
Tanü election agiba constituency 18 ya Maoists telungpurtemi timtem agutsüba district tem nung lir. Maoists-i nüburtem dang item election nung shilem magitsü amokmerena tesüiba anogo ishika timtem agüja arur tanep-a polling tenzüktsü minute ishika lia parnoki Dantewada district kübok Katekalyan nung Improvised Explosive Device (IED) bomb ka amshia Central Reserve Police Force (CRPF) sepaitem amak, saka nisung yiruba mesüra asüba osang maliasü.
Ano Bijapaur district kübok Pamed area nunga sepai aser telungpur na tsüngda khatepdang CRPF sepai ana yiruogo.
Tanü Congress-i Bastar area nung EVM raksaa amshiogo, ta tai tongloktsü saka Election Commision-i ibaji magizük.
Tanep 7:00 ako nungi tenzüka menden 10 atema vote agutsü tenzük aser menden 8 atema 8:00 ako nungi vote agutsü tenzüka liasü.
Narayanpur, Dantewada, Bijapur, Konta, Mohla-Manpur, Antagarh, Bhanupratappur, Kanker, Keshkal aser Kondagaon nung nikongdang 3:00 ako tashi vote agutsü aser Khairagarh, Dongargarh, Rajnandgaon, Dongargaon, Khujji, Bastar, Jagdalpur aser Chitrakot nung nikongdang 5:00 ako tashi vote agutsü.
Tanü menden 18 atema candidate 190-i toktepogo aser vote agütsütsüpur lakh 31 nungi tebur lakh 15 aser tetsür lakh 16 liasü.
2013 küm election nung tanü election agiba menden 18 nungi BJP-i menden 12 tashi nung tamakok ngua liasü.
Chhattisgarh nung election tanabuba shilem November 20 nü agitsü.