Chhattisgarh nung Congress-i nübur sorkar tentettsü: Rahul

Korba, Yimpoksüi/November 14 (Agencies): Tanü Congress Tir, Rahul Gandhi-i, Chhattisgarh nung Congress-i nübur sorkar ka tentettsü, ta nangzüka BJP-i küm 15 yimsüsüba mapang state jenjang raksatsüogo, ta aitsü.
Chhattisgarh nung election tanabuba shilem atema tanü Korba nung nüboyimba sentong nung jembidang Gandhi-i, “Tzü, arem, mines aser minerals tsütsü linük nung iba state ya takar state rongnung ka lir. Ajisüaka Bharatiya Janata Party (BJP) sorkari benokba mapatongtem ajanga nüburtem sensaka alir,” ta ashi.
Iba state den par kibong tesendaktep junga lir, ta shia pai, iba tesendaktepji yimtenren indang masü saka temeim tesendaktep lir, ta ashi.
Paisa, industries amenoktsü atema iba tesem nung tribal tem indang ali sorkari agi, ajisüaka units ji mamenok aser aliji nüburtem nem meyipa magutsü, ta ashi.
“Congress-i state nung nüburtem meyong sorkar ka tentettsü aser ibaji ajanga aluyimertem aser tilateri shishilembartem nem tashi agutsütsü aser lanurtem nem mapa agutsütsü,” ta Congress Tirisa nangzük.
State nung Congress-i sorkar tentetra party-i Land Acquisition Act benoktsü aser aluyimertem dang sentsüh atokba den külemi aluyimertemi züsentetba aonsotsütem atema bonus aser Minimum Support Price (MSP) agutsütsü, ta paisa nangzük.
Chief Minister, Raman Singh-i aniba sorkari ochimashi inyaker, ajisüaka Chhattisgarh nung ochimashi tulu aliba atema Ato kilonser, Modi-i ola madoker, ta pai aitsü.
“Ni sensakertem, aluyimertem aser lanurtem atema yimtenren mapa inyaker. Parnok jenjang majungtsüsa ni industrialist 10-15 mekümzüktsü,” ta pai ashi.
November 12 nü Chhattisgarh nung election mezüngbuba shilem constituency 18 nung agiogo aser item menden nungi menden 12 Scheduled Tribes aser menden ka Scheduled Caste atema shitetja lir.