Chhattisgarh nung Khristantem amak

Raipur, October 20 (Agencies): India kübok Chhattisgarh state nung aliba Jaripara yimtsüng nung Hindu nunger tali bilemloka oa amangertemi Khristantem amak, ta International Christian Concern (ICC)-i osang metetdaktsü.
October 15, 2017 nü Bastar for Christ Movement (BCM) Church nung Khristantem tekülem sentep agia alidang nisung 300 shi aru aser amak. Iba lendong nung nisung 9 yiru aser anabo kanga mejungi Dantewada nung aliba sorkar mozüki ka nung anepaludar, ta ICC-isa ashi.
Anüngdang 12:00 ako meta tekülem sentong agia lia nisung 300 shi kati BCM Church meketbang aser parnoki sentepji anendaktsü. Iba sülen nisungtem jagi tekülemertem kimai atsüzük aser parnok dang tamangba yimsü tokjang ta tetuyuba agütsü, ta tenük kuli angurtemi ashi.
Khristantemi parnok tamangba yimsü metoktsütsü ta ashiba sülen Hindu nunger jagi parnok dak süng aser slippers agi azüktsü tenzük. Parnoki tetsürtem süoshi shisatsü aser tanurtem dak-a teka sangshi. Hindu nungertem jagisa BCM Church raksatsü aser arogo indang osettem nung mi senoktsü, ta kuli agütsürtemisa ashi.
Iba lendong nung Khristan aika yiru aser parnok rongnung Raju Sodi aser Sangetha Kartami na tekolak aser teka kanga mejungi yiru. Tena mezüng anameta aliba mozüki kati anir ao aser idak nungjagi Dantewada-i belena anir ao.
“Jaripara nung Khristantem amakbaji taochi makaba inyakyim ka lir aser ajaki aitsütsüsa atalokogo” ta idakji aliba pastor kati ashi.
“State elections agitsü mapang tonga aruba mapang Khristantem amaka mapa inyaktsü tenzükogo. Tang state nung BJP sorkar lir aser iba jagi Hindu nunger tali bilemloka oa amangertemi parnok yimten tsütsü tajangzük angutsü atema telok tilatem anema inyaker” ta paisa ashi.
Taoba Deobarnü lendong atalokba sülen police-i mezüngbo First Information Report (FIR) agizüktsü memulung.
Iba ya matalokdang Hindu nungertemi tamasa police tsüngda FIR ka benoker liasü.
Jaripara nung aliba Khristantemi ghonda 24 shi police dang mepishiba sülen ang FIR ji agizük saka parnoki temeden agütsütsü asoshi tamang makar.
BJP-i aniba sorkar kümtetba sülen tamangba yimsü dak sendakba tesemtem amakba kanga bulua inyaker. BJP lennirtemi telok tilatem anema o jembir aser iba ajanga talia bilemloka oa amangertem ajungmesor.
Open Doors USA ajanga ashiba agi, 2017 küm tenzüker ita trok tsüngda India nung Khristantem 410 tashi amak. 2016 küm Khristantem amakbaji 441 ben liasü aser taküm kanga agi teimba amaker, ta parnokisa ashir.