Chhattisgarh nung Maoists 19 temai adok

Raipur, December 13 (Agencies): Deobar nü Chhattisgarh, Kondagaon district nung Maoists ketdangser ana densema telungpur 19 tashi temai adoka police matsüngdangi aruogo, ta police osang ka ajanga ashi.
Telungpur 19 temai adoka police ketdangsertem matsüngdangi aruogo, aser parnoki Maoists inyakyim nung temelung masüba aser security sepaitemi parnok anema sashia raraba ajanga parnok temai adok ta parnoki shiogo, ta Kondagaon Superintendent of Police, JS Watti-i tanü osangbenertem dang ashi.
“Iba ya ano Bastar police atema takok tulu ka lir, kechiyong tawa telungpur 26 temai adokogo,” ta Watti-isa ashi.
Parnok rongnung arishi küm 35 Hemchand Mandavi (Ballu) ya Chargaon LOS (local operation squad) of Maoists nung deputy commander lir aser arishi küm 36 Jairam Korram (36) ya Mandoda CNM (Chetna Natya Manch- Maoists cultural wing) lenir lir, ta Watti-isa shisem.
Ballu pua aruteter mesüra tepseter nem senpet lakh 3 aser Jairam pua aruteter mesüra tepseter nem senpet lakh ka agütsütsü tamalen sangdonger liasü, ta ketdangserisa ashi.
Tanüngba Maoists züngsemtemji Janmlitia züngsemtem liasü aser Kanker o Kondagaon na nung Maoists-i amakbatem nung shilem agirtem lir, ta SP-i ashi.
“Chhattisgarh sorkar inyakyim nung ajemdaker parnok nem nüngdakba teyari balala agütsütsü,” ta paisa shiogo.