Chhattisgarh nung Maoists 5 kahset

Raipur, November 19 (Agencies): Chhattisgarh, Narayanpur district kübok arem ka nung security sepaitemi Maoists telungpur pongu kahsetogo, ta tanü police osang ka ajanga metetdaktsü.
Osangbenertem den jembidang Inspector General of Police (Bastar Range), S R P Kalluri-i, “Yasüng tesü Chhotedongar police station kübok Tuspal aser Becha Kilam yim na nung aliba arem nung District Reserve Group (DRG) aser telungpurtem kahtepa liasü,” ta metetdaktsü.
Kalluri-isa, “Narayanpur nung kahtepdang Maoists, Military Company VI nungi parnok trok jungnüa tepset,” ta ashi.
Kondagaon aser Narayanpur districts na nungi DRG sepai senteper Abhujmad tesem mita ao; iba tesem ya Maoist bulua aliba tesem lir, ta IG-isa metetdaktsü.
Tuspal aser Becha Kilam arem nung kahtepba sülen tasümang pongu aser raraba oset aika angu, ajisüaka security sepaitem yiruba mesüra asüba osang mali.
November 16 nüa Dantewada nung sepai aser telungpur tsüngda kahtepdang tetsür asem densema telungpur trok kahset, iba sülen anogo ishika tsüngda tang telungpur pongu kahseter.
Item ajakji senteper tan ita Bastar region nung tatalokba balala nung Maoists 15 tepsetogo, IG-isa shisem.