Chhattisgarh nung Maoists 56 temai adok

Raipur, March 13 (Agencies): Deobarnü Chhattisgarh, Bastar district nung tetsür asem densema Maoists telungpur 56 temai adoka police matsüngdangi aruogo, ta police osang ka ajanga metetdaktsü.
Telungpurtemji timbaka tilartem liasü, aser parnok ajak Jagdalpur district headquarters nung police ketdangsertem aser sorkar ketdangsertem matsüngdangi aru.
Osangbenertem den jembidang Bastar Superintendent of Police, RN Dash-i, “Area committee züngsem ka, Janmilitia deputy commander ana, janmilitia commanders asem, Maoists frontal telok-Dandakaranya Adivasi Kisan Majdoor Sangthan (DAKMS) 12, DAKMS tongti ka, janmilitia züngsem 19 aser sangham züngsem 18 tanü parnok sasa raraba toktsüogo,” ta metetdaktsü.
Maoist tetsür arishi küm Shabnam Mandavi (Mase) ya area committee züngsem liasü aser la tepseter nem senpet lakh 5 agütsütsü sangdonger liasü. Lai-a muzzle loading prangpong ka bener aru, ta paisa ashi.
Iba den kasa DAKMS tongti, Sonu Dudhi tepseter nem senpet lakh 5, Janmilitia commander tem – Lakhma Madkami (25), Ghasiya Baghel (25) aser Rama Dhurva (20) nunger tepseter nema senpet lakh kaka agütsütsü sangdonger liasü.
Dash-i ashiba agi, parnok ajaki Maoists tangatetba aser rara nung melung masüba ajak toktsü.
Dash-isa, “Parnok timbaka ket nung sorkar scheme balala indang card liasü. Item rongnung ration aser Aadhaar cards liasü. Parnok 46 ket nung Aadhaar cards, 36 ket nung voter ID cards aser ration cards liasü. Parnok rongnung nisung pongu ket nungbo bank accounts liasü,” ta ashi.
“Temai adoker telungpur shia nem sen 10,000 agütsüogo aser surrender policy nung aliba ama teyari balala agütsütsü,” ta paisa shisem.
Bastar nung tesüiba ita asem tsüngda Maoists telungpur 182 temai adokogo.