Chhattisgarh nung Maoists-i bomb amshia amakdang CRPF 7 pokset

Maoists temi bomb amshia amakdang CRPF sepaitem indang Tata-709 mini-truck poksaba aser tasümangtem angur.

Raipur, March 30 (Agencies): Bodhbarnü Chhattisgarh, Dantewada district nung Maoists telungpurtemi bomb ali nung rema toktsür amakdang Central Reserve Police Force (CRPF) sepai tenet tepsetba sülen telungpurtem jagi sepaitem prangpongtem bener ajen, ta police osang ka ajanga ashi.

Kasa osang ajanga, “Dantewada nungi kilometer 12 shi pilar Melwada anasa telungpurtemi bomb tesashi ka pokdakja amakdang paramilitary 230 battalion nungi CRPF sepai tenet iba tesem nungjisa tepset,” ta ashi.

State nung tribal aliba tesemtem nung sepaitemi telungpurtem sashia mita aoba mapang ka nung parnoki sepaitem makogo.

Ano ketdangsertemi ashiba agi, Bodhbar nikongdang 4:00 ako meta CRPF indang Tata-709 mini-truck jagi lenmang nung bomb rema aliba nungji menüngshia ibaji apokba lendong nung truck nung mena alir par tenetprongla pokset.

Mezüng bushisüngdangba osang ajanga ashiba agi, Sub-Inspector-rank ketdangser ka leniba nung sepaitemji sepai uniform magi liasü.

“Telungpurtem jagi sepaitem indang raraba oset ajak auyar ajen. Iba tesem jagi sepai tali yoksemogo,” ta ketdangsertemisa ashi.