Chhattisgarh nung Maoists-i gari 12 rongtoktsüogo: Police

Raipur, October 30 (Agencies): Chhattisgarh nung Kanker aser Bijapur district na nung Maoists telungpurtemi passenger bus ana aser truck kar densema gari 12 rongtoktsüogo, ta tanü police-i ashi.

Ajisüaka item tatalokba nung nisung shinga meyiru, ta parnokisa ashi.

Tanep telungpurtemi Kanker nung Chargaon iron ore atuba tesem amak. Aayangertem amokmerenba sülen parnoki iron ore atuba nung amshiba gari 10 rongtoktsü, ta Kanker Superintendent of Police, Jitendera Singh Meena-i ashi.

Gari aser machine tem rongtoktsüba sülen Maoists telungpurtemji aremleni jena ao, ta paisa ashi.

Iba tesem nungji company kati iron ore atubaji Maoists telungpurtemi anemer, ta osang ajanga angazüker.

Taküm April mezüngnü iba company nung General Manager densema ketdangser pezü apu, ajisüaka kasa anogo nungsa parnok ajak chioka liasü.

Telungpurtem jagisa bus ka nungi passenger tem aludaktsüba sülen gariji rongtoktsü. Iba den külemi yasüng Bijapur district nunga passenger bus ka dak injang kalokja liasü.

Telungpur telok kati bus ji Dudheda aser Gorla yimtsüng na tsüngda anendaktsü aser passengertem aludaktsüba sülen mi senoktsü, ta police ketdangseri ashi.

Telungurtem jagisa pamphlet kar toktsür ao. Item pamphlet nungji police temi par züngsem ka mechiokba atema aija liasü, ta paisa ashi.

Telungpurtemji aputsü atema operation ka tenzükogo, ta police-i ashi.

October 25 nüa Bijapur nung Maoists telungpurtemi gari aser machine tajemba agi 37 rongtokja liasü.