Chhattisgarh nung Maoists pur 4 khaset

Raipur, Metsüremi/March 26 (Agencies): Lok Sabha election atongtsü lia Chhattisgarh kübok, Sukma district Bastar tesem nung Mongolbar anepdang security force den khatepba mapang Maoists pur asütsü ta temulung melemi bilemba telungpur pezü khasetogo, ta police sangdong ka ajanga metetdaktsü.
Police temi ashiba agi, parnoki automatic rifle ka aser country-made pistols ana ta telungpur den khatepba sülen Karkunguda tesem nung arem ka nungi ngutetogo.
“Telungpur aser sepaitem tsüngda South Sukma, Chintalnaar police station kübok arem ka nung anepdang 6:00 ako meta khatep. CoBRA commandos team ka aser police temi yashi nikongtsütsü mita aoba mapa ka tenzüker mita aodang Karkunguda tesem nung arem ka nung Maoists pur den ajurutep,” ta inspector general of police (Bastar) Vivekanand Sinha-i ashi.
Commando Battalion, police aser Maoists purtem tsüngda minute 45 shi khatep aser telungpur tasümang pezü ya iba sülen ngutetogo.
“Onoki tanep khatepba tesem nungi Insas rifle ka, 303 rifle ana ta ngutetogo,” ta Sinha-i ashi.
Lok Sabha election 2019 matong tsüngda Bastar division kübok aremtem nung maoist pur meita aoba sentong tali akangshiogo.
Sukma ya Bastar constituency kübok lir aser iba tesem nung April 11 nü vote ajentsü. Chhattisgarh nung taruba election ya April 11, April 18 aser April 23 nü agitsü, aser result May 23 nü sangdongtsü.