Chhattisgarh nung Maoists rara züiner

 

Raipur, September 15 (Agencies): Chattisgarh nung Maoists telungpurtemi timtem agüja aruba rongnung 2015 küm yasa tamajungtiba lir aser tang tashi nung iba state  nung Maoists dak sentakba tatalokba 362 ta ashi lir.

2014 küm den medemdangra state nung taküm Maosits dak sentakba rara shilem 34 agi timba kümogo.

Tesüiba ita 8 tsüngda Left Wing Extremism (LWE) Maoists-i timtem agütsüba state 10  nung tatalokbatem kanga ajema kümogo, ajisüaka Chhattisgarh nungbo Maoists dak sentakba ken o taliba akümer.

Ajisüaka item tatalokba nung nisung asübabo yaküm dang nungi tajemba, kechiyong 2014 küm nisung 734 asü saka takümbo July 15, 2015 nü tashi nung nisung 62 dang süogo.

2014 küm August ita tashi nung Chhattisgarh nung Maoist dak sentakba rara 270 liasü aser taküm August ita tashi nung rara 362 liasü. Koba tetezü ita shia Maoists dak sentakba rara 45 shi ataloker.

State police data ajanga ashiba agi, 2014 küm August ita tashi nung security aser sorkar sepai 50 asü aser taküm August ita tashi nung sepai 39 asü.

Ano civilian asübabo shilem 29 tali kümogo, kechiyong yaküm nübur 24 asü saka takümbo 31 tashi süogo.

Data ajangasa, August 2014 aser August 2015 küm Maoists asüba aser police matsüngdangi aruba züngdangbaji kasa dang. Küm anaprong August ita tashi nung Maoists 22 asü aser Maoists 115 police matsüngdangi aru.

Yaküm August ita tashi nung Maoists 334 apu aser taküm August ita tashi nung Maoists 437 puogo.