Chhattisgarh nung Maoists tetsür 4 kahset

Raipur, November 22 (Agencies): Tanü Chhattisgarh, Sukma district nung Maoists telungpur aser security sepaitem na tsüngda kahtepba mapang tajemba agi telungpur tetsür pezü kahset aser Maoists lenir ka yiruogo.
Gadiras Police Station kübok arem nung Maoists telungpur anema aoba operation ji Dantewada district nung Special Task Force (STF), District Reserve Group aser Central Reserve Police Force (CRPF) na senteper agi, ta Inspector General of Police, Bastar Range, S R P Kalluri-i osangbenertem dang ashi.
Kalluri-i ashiba agi, Gadiras tesem nungji ‘Divisional Commander’, Aaytu den telungpur telok ka lir ta osang lazükba sülen operation ji agia liasü.
Aaytu ji Darbha Division Maoists nung DVC züngsem lir aser paisa Malangir Area Committee, in-charge repsema abener.
“Iba tesem nungji Aaytu aliba osang onoki yasüng angazükba sülen pa aputsü atema maparen tenzük,” ta IG-isa ashi.
Tanep 5:00 ako meta sepaitemi Nagalguda Pahad (hill) nung aliba arem lungbang, aser telungpurtemi sepaitem aliba meteta injang sashia kahloktsü, ta pai ashi.
Ghonda ana sashia kahtepba sülen telungpurtemji ajen. Tesem nungji telungpur tetsür pezü tasümang anguba den 303 rifle ka, 12-bore rifle ana aser telungpur shidi kar angu, ta paisa ashi.
Iba rara nung Maoists lenir Aaytu-a yiru saka par sepaitemi pa arem telungleni anir ajen.
Tanü kahsetba densemabo tan ita Bastar police-i Maoists 14 ashi tepsetogo.